Iwwert eis

Profil

Grenziwwerschreidend Beweegunge ginn Impulser fir gesellschaftlech a kulturell Verännerungen: zum Beispill duerch d‘physesch Beweegung vu Mënschen, awer och duerch dat symbolescht Iwwerschreide vu Grenzen vum (bis elo) Erlaabten an Üüblechen. Onofhängeg dovun, ob se sech op Mënschen, Discoursen, Texter, sproochlech Strukturen, Konschtwierker etc. bezéien, kënne Prozesser vun den Deplacéierungen als Motore vun der kontinuéierlecher Ëmgestaltung vun existente Wëssens- a Praxisforme betruecht ginn. Ënnert de Stéchwierder ‚Migratioun‘ an ‚Interkulturalitéit‘ bezitt sech den 2014 ageriichte Schwéierpunktberäich „MIS – Migratioun an Interkulturell Etüden“ op esou Prozesser.

Virun allem zu Lëtzebuerg sinn opgrond vu sproochlechen a kulturelle Partikularitéiten eng Villzuel vun interkulturellen Dynamiken a soziokulturellen Transformatioune sichtbar, déi sech mat dem Begrëff vun der Deplacéierung beschreiwe loossen. Andeems de Schwéierpunktberäich d’Entwécklungen, déi hei ewéi anerwäerts ze beobachte sinn, op Migratioun an Interkulturalitéit bezitt, sollen Engféierunge vun zentrale Leedbegrëffer vun der  Gemeinschaftskonstruktioun (z. B. Natioun a Kultur, Identitéit an Alteritéit, Zentrum a Peripherie) hannerfrot an opgebrach ginn. Am Zentrum steet eng prozessorientéiert-perfomativ Perspektiv op Migratioun an Interkulturalitéit.

Uknëppend un aktuell Entwécklunge vun de Kultur- a Sozialwëssenschaften ënnersicht de Schwéierpunktberäich déi produktiv-kreativ (Re-)Kombinatioun vu kulturelle Repertoiren an ënnerschiddlechen Dimensiounen:

  • Poiesis & Ästhetik;
  • Verschiebung & Mobilitéit;
  • Politiken & Pouvoir;
  • Raum & Materialitéit;
  • Sujet & Alldeeglech Praktiken
  • Zäit & Entwécklung

Déi u sozialen a kulturelle Praktiken orientéiert Analys vu Migratioun an Interkulturalitéit leescht e Bäitrag, fir Entwécklungslogike vu Gesellschafte bestëmmen an Orientéierungswëssen a méisproochegen an interkulturelle Kontexter bereetstellen ze kënnen. Ausserdeem bedeelegt sech de Schwéierpunktberäich un der allgemenger Diskussioun an der Migratiouns- an Interkulturalitéitsfuerschung a stellt seng Expertise an engem internationale Kontext zur Verfügung.

De Schwéierpunktberäich ass an der humanwëssenschaftlecher Fakultéit (FLSHASE)  vun der Universitéit Lëtzebuerg ugesidelt. Déi bedeelegt Wëssenschaftler sinn am multidisziplinäre Verbond organiséiert a setze mat hirer Aarbecht folgend Zilsetzungen ëm:

  • Méi enk Vernetzung vun de Wëssenschaftler vun der humanwëssenschftlecher Fakultéit an Zesummenaarbecht mat anere Fakultéiten
  • Méi staark Verankerung vun den Theme Migratioun an Interkulturalitéit an der Fuerschung an an der Léier
  • Méi grouss Visibilitéit vun der lëtzebuergescher Migratiouns- an Interkulturalitéitsfuerschung

Déi um Schwéierpunkt bedeelegt Wëssenschaftler schaffen nom Prinzip vun der rezeptiver Méisproochegkeet am Kader vun den Aarbechtssprooche vun der Universitéit Lëtzebuerg.